गुन्हेगारीचा पर्दाफाश….!अवैध दारूविक्रीवर किल्लारी पोलिसांची कारवाई
किल्लारी येथील पोलीस स्टेशनच्या हद्दीतील तपसे चिंचोली, लामजना परिसरात अवैध दारू विक्री करणाऱ्यांविरोधात पोलिसांनी अचानक छापे टाकून सोमवारी कारवाई केली.
पोलिसांनी सांगितले की, गेल्या अनेक दिवसांपासून लामजना, तपसे चिंचोली परिसरात चोरट्या पद्धतीने दारूची विक्री करण्यात येत होती. त्यामुळे सहायक पोलीस निरीक्षक सुनील गायकवाड, पोना कृष्णा गायकवाड, चालक मुळे अशा तीनजणांचे पथक तयार करण्यात आले होते. या पथकाने पोलीस स्टेशनच्या हद्दीतील तपसे चिंचोली, लामजना शेतशिवार आणि लामजना येथे छापा टाकून दारूचा साठा जप्त केला असून, संबंधितांवर गुन्हे दाखल केले आहेत.
लामजना, तपसे चिंचोली शेत शिवार येथे श्रीमंत हरी पवार हा शेतामध्ये बांधालगत देशी विदेशी दारू ठेवून विक्री करत असताना मिळाल्याने एकूण ३१०० रुपयांचा मुद्देमाल जप्त करण्यात आला. तसेच तपसे चिंचोली येथे दिलदार लायक शेख, विठ्ठल विश्वनाथ येळनुरे हे एका घराजवळ अवैध दारू विकताना मिळून आले. त्यांच्याकडून ७७० रुपयांचा मुद्देमाल जप्त केला आहे.
तसेच लामजना येथे आकाश गंगाधर तेली हा अवैध सिंधी दारू विक्री करत असल्याचे दिसून आले. त्यानुसार त्याच्याकडून ५०० रुपयांचा मुद्देमाल जप्त केला आहे.. पुढील तपास किल्लारी पोलीस करीत आहेत.
