घरफोड्या करणाऱ्या फरार सराईत गुन्हेगाराला अटक
चोरीच्या 2 मोटारसायकली,सोन्या चांदीचे दागिने सह 2 लाख 9 हजार रुपयाच्या मुद्देमाल जप्त. स्थानिक गुन्हे शाखेची कामगिरी.
याबाबत थोडक्यात हकीकत अशी की, पोलीस अधीक्षक श्री.निखिल पिंगळे यांनी लातूर जिल्ह्यामध्ये घडणारे चोरी व घरफोडीचे गुन्हे उघडकीस आणण्याकरिता आदेशित व निर्देशित केले होते. त्या अनुषंगाने अपर पोलीस अधीक्षक श्री.अनुराग जैन, उपविभागीय पोलीस अधिकारी लातूर शहर श्री. जितेंद्र जगदाळे यांचे मार्गदर्शनात व स्थानिक गुन्हे शाखेचे पोलीस निरीक्षक श्री.गजानन भातलवंडे यांचे नेतृत्वात स्थानिक गुन्हेचे विविध पथके तयार करून जिल्ह्यात घडलेल्या घरफोड्या संदर्भाने तपास करण्यात येत होता.
त्या अनुषंगाने दिनांक 21/09/2022 संध्याकाळच्या सुमारास स्थानिक गुन्हे शाखेच्या पथकाने मिळालेल्या गोपनिय माहितीच्या आधारावर पोलीस रेकॉर्डवरील सराईत गुन्हेगार राम दगडू गर्गेवाड याला ताब्यात घेतले. त्याच्याकडे अधिक चौकशी केली असता त्याने पोलीस ठाणे किनगाव हद्दीत घरफोडी करून सोन्याचे दागिने चोरी केल्याचे सांगितले. त्या संदर्भाने किनगाव पोलीस स्टेशन येथे माहिती घेतली असता तेथे गुन्हा रजिस्टर क्रमांक96/2022 कलम 457,380 भादवी प्रमाणे गुन्हा दाखल असल्याचे निष्पन्न झाले.
तसेच त्याने पोलीस ठाणे गांधी चौक व शिवाजीनगर येथे दाखल असलेल्या मोटारसायकल चोरीच्या गुन्ह्यातील दोन मोटरसायकली चोरून त्या त्याचे राहते घरासमोरून लावलेले होते ते जप्त करण्यात आले आहेत. त्याच्याकडून एकूण 2 लाख 9 हजार रुपयांचा मुद्देमाल हस्तगत करण्यात आला आहे.
राम दगडू गर्गेवाड हा सराईत गुन्हेगार असून घरपोडी आणि चोरीचे गुन्हे करण्याच्या सवयीचा आहे. तो लातूर जिल्ह्यातील पोलीस ठाणे विवेकानंद चौक ,एमआयडीसी, किल्लारी, उदगीर ग्रामीण ,जळकोट, अहमदपूर इत्यादी ठिकाणी दाखल असलेल्या चोरी व घरफोडीच्या गुन्ह्यामध्ये फरार असल्याचे निष्पन्न झाले आहे. त्याने त्याचा साथीदार आकाश उर्फ भावड्या बाबुराव कांबळे अशा दोघांनी मिळून विविध ठिकाणी घरपोडीचे गुन्हे केल्याचे कबूल केले आहे.
स्थानिक गुन्हे शाखेच्या सदर पथकाने अतिशय सिताफिने सराईत गुन्हेगार नामे
राम दगडू गर्गेवाड, वय 25, वर्ष राहणार मळवटी रोड, लातूर. याच्याकडून तीन गुन्हे उघडकीस आणून सोन्या चांदीचा मुद्देमाल व 2 मोटरसायकली असा एकूण 2 लाख 9 हजार 500 रुपयांचा मुद्देमाल जप्त करण्यात आलेला आहे.
राम दगडू गर्गेवाड यास पुढील तपास कामी पोलीस ठाणे गांधी चौक येथे दाखल असलेल्या गुन्ह्यामध्ये दिनांक 22/ 09/2022 रोजी अटक करण्यात आलेली आहे. पुढील तपास गांधी चौक पोलीस करीत आहेत
सदरची कामगिरी वरिष्ठांचे मार्गदर्शनात व स्थानिक गुन्हे शाखेचे पोलीस निरीक्षक गजानन भातलवंडे यांचे नेतृत्वात पोलीस उपनिरीक्षक शैलेश जाधव, सहाय्यक पोलीस उपनिरीक्षक संजीव भोसले, राम गवारे ,सुधीर कोळसुरे राहुल सोनकांबळे, सिद्धेश्वर जाधव , बंटी गायकवाड, मोहन सुरवसे, नुकुल पाटील यांनी बजावली आहे.